22 април 2026
• од Темелко Тошев
Она што некогаш беше гордост на Струга, денес доживува црни денови. ФК Караорман, клубот со богата историја, се соочи со понижувачки пораз и прекин на натпреварот против Кравари во рамките на 14. коло од Третата лига – Југозапад.
Проблемите за стружани започнаа уште пред почетокот на средбата. Неверојатно за клуб со такво реноме, Караорман допатува на гостувањето кај Кравари со само девет фудбалери во својот состав. Ваквата ситуација веднаш навести катастрофа на теренот.
Бројчаната инфериорност домаќините ја искористија уште во првиот дел, во кој мрежата на гостите се тресеше дури пет пати. На паузата се замина со високи 5:0, но вистинскиот скандал дојде на самиот почеток на второто полувреме.
Наместо борба за чесен пораз, натпреварот заврши предвреме. Во 49. минута, екипата на Караорман остана со само шест играчи на теренот, што според фудбалските правила значи автоматски прекин на натпреварот бидејќи екипата нема доволен број играчи за да продолжи со игра.
Во официјалниот записник од натпреварот стои:
„Во 49. минута, гостинската екипа остана со шест играчи на теренот и поради немање на доволен број на играчи, натпреварот не продолжи.“
Ова е тежок удар за навивачите на Караорман, особено ако се земе предвид дека овој клуб е есенски шампион во Третата лига – Југозапад. По испаѓањето од Втората лига пред две сезони, сите очекуваа експресно враќање во повисок ранг, но реалноста на теренот покажува сериозна организациска криза.
Како е можно есенски шампион и фудбалски бренд на Струга да не може да собере 11 играчи за првенствен натпревар? Ова е прашањето кое денес си го поставува целокупната спортска јавност во Македонија, додека Караорман ги допира најниските точки во својата понова историја.
Ненадминливи Понуди Дневно
4.8 (10276 рецензии)
Заштедете 152.00 ден

